كيفاش تخدم صور إعلانات احترافية بـ ChatGPT في دقيقة
شفتو الصور اللي الناس راهم يديروها: بوستر إعلان فيه الوجه تاعك والمنتج تاعك، بجودة تاع وكالة إشهار. السر ماشي في البرنامج، السر في البرومبت. في هاد المقال نوريلك الطريقة اللي خدمت بيها، خطوة بخطوة.
النتيجة النهائية: بوستر إعلان بالصورة تاعي والمنتج
واش يلزمك
- ChatGPT (النسخة المجانية تخدم، بصح المدفوعة تعطيك صور أكثر وجودة أحسن).
- موقع MeiGen Gallery (meigen.ai): مكتبة فيها آلاف الصور والفيديوهات مع البرومبت تاعهم.
- جوج صور: صورتك (ولا صورة الموديل) وصورة المنتج تاعك.
الطريقة خطوة بخطوة
- روح لـ meigen.ai. تلقى آلاف الصور والفيديوهات، وكل وحدة معاها البرومبت اللي خدموها بيه. استعمل الفلاتر على اليسار (Pub & Produit، Marque & Logo…) باش تلقى الستيل اللي يناسبك.
MeiGen Gallery: مكتبة الصور بالبرومبت
- أضغط على الصورة اللي عجبتك. أنا اخترت إعلان عطر بستايل luxury.
صفحة الصورة مع البرومبت على اليمين
- أضغط على Copier le prompt باش تنسخ البرومبت كامل.
Copier le prompt
البرومبت فيه كلمات بين [ ] كيما [BRAND NAME] و [FEMALE]. هادو لازم تبدّلهم: اسم البراند تاعك، و MALE ولا FEMALE حسب الشخص اللي في الصورة.
- أفتح ChatGPT، أضغط على + وحط جوج الصور: صورتك وصورة المنتج.
جوج الصور في ChatGPT
- الصق البرومبت تحت الصور، بدّل الكلمات اللي بين [ ]، وابعث.
البرومبت ملصوق مع الصور
- استنا شوية، ChatGPT يخرجلك البوستر. إذا حبيت تبدّل حاجة (الكتابة، الألوان، الخلفية) اكتبلو واش تحب ولا أضغط على Modifier.
النتيجة في ChatGPT
نصايح باش تخرج مليحة
- صور واضحة وبإضاءة مليحة = نتيجة أحسن. صورة المنتج يستحسن على فوند نقي.
- اختار برومبت قريب من المنتج تاعك (عطر مع عطر، لبسة مع لبسة) باش ChatGPT يفهم الستيل.
- دير اسم البراند تاعك والمنتج تاعك، ماشي اسم البراند اللي كان في الصورة الأصلية.
- ما تستعملش صور ناس آخرين بلا إذنهم.
- جرّب 2 ولا 3 برومبتات مختلفين وخلي اللي يجيب أحسن نتيجة في الإعلانات.
الخلاصة
meigen.ai ← تختار صورة ← Copier le prompt ← ChatGPT + جوج صور + البرومبت ← بوستر إعلان واجد.
حب الموقع والبرومبتات اللي نستعمل؟ اكتب «AI» في التعليقات
@karim_haned