3 طرق باش تلقى منتجات رابحة بلا ما تضيّع وقتك
أكبر وقت يضيع في الـ E-commerce هو التحواس على المنتج. ناس تقعد سمانات تقلّب في Facebook وفي الآخر تختار منتج بالصدفة. في هاد المقال نوريلك 3 طرق نستعملهم أنا باش يجيني المنتج لعندي، بلا ما نضيّع الوقت.
الفيديو: أرواح تتعلم تلقى منتجات رابحة ما تضيّعش وقتك
الطريقة 1: أدوات الـ Spy
كاين مواقع كيما Minea و PiPiAds وبزاف أخرين، يعرضو كل نهار الإعلانات والمنتجات اللي راهي تخدم مليح. بلاصة ما تحوس وحدك، تشوف واش راه يتباع بالصح.
Minea (Le top 10 du jour) و PiPiAds
1. افتح الأداة وفلتر حسب الـ catégorie (دار، كوزينة، أطفال، سيارات…) والبلاد.
2. شوف الإعلانات اللي فيها تفاعل كبير (لايكات، تعليقات، بارتاج) واللي راهي تخدم من مدة، ماشي نهار ولا زوج.
3. سجّل المنتجات اللي عجبوك في ليستة، ومن بعد تأكد: يتباع في الجزاير؟ تقدر تلقاه هنا ولا يتصنع محلياً؟ الهامش يسمحلك بالإعلان والتوصيل والروتور؟
المنتج اللي خدم برا ما يخدمش ديما في الجزاير. خذ الفكرة، وقيسها على السوق تاعنا (COD، السعر، القدرة الشرائية).
الطريقة 2: Pinterest
Pinterest مكتبة أفكار منتجات ضخمة، والسر هو كيفاش تدرّب الألغوريتم تاعو باش يجيبلك المنتجات لعندك.
1. افتح compte جديد خاص بالتحواس على المنتجات برك.
2. حوس بكلمات مفتاحية بالعربية ولا بالإنجليزية ولا بالفرنسية، مثلاً: problem solving products، product review، gadget maison، kitchen gadgets.
3. كل منتج يبانلك مليح، دير عليه like ولا sauvegarde.
4. مع الوقت Pinterest يفهم واش راك تحوس، ويولي يعرضلك كل نهار منتجات جديدة. اللي يعجبك حطو في board (الـ dashboard تاعك) باش ترجعلو.
الطريقة 3: Claude (يخدم بلاصتك كل نهار)
تقدر تعطي لـ Claude prompt وتبرمجو باش كل نهار يعطيك ليستة منتجات على حسب السوق الجزائري والشروط اللي تحب.
ليستة المنتجات اللي يخرجها Claude: الإسم، النقطة، الفئة
1. اكتب الـ prompt بالشروط تاعك. مثال:
كل نهار الصباح، عطيني 50 منتج ينجمو يتباعو مليح في السوق الجزائري بالدفع عند الاستلام. صنّفهم حسب الفئة (دار، كوزينة، أطفال، سيارات، جمال). لكل منتج: الإسم، المشكل اللي يحلّو، يتصنع محلياً ولا يلزم استيراد، سعر بيع تقريبي بالدينار، ونقطة من 10. حط الأولوية للمنتجات اللي ما يحتاجوش شرح وما يتكسروش في التوصيل.
2. برمجو كـ tâche planifiée (scheduled task) يومياً، باش تلقى الليستة كل صباح بلا ما تعاود تكتب.
3. بدّل الشروط على حسبك: الـ catégories، محلي ولا استيراد، الميزانية، النوع تاع الزبون.
Claude يعطيك أفكار وترتيب، بصح الأرقام (الأسعار، الطلب) لازم تتأكد منها بنفسك قبل ما تخلّص على الإعلان.
كيفاش تعرف بلي المنتج رابح قبل ما تخلّص؟
يحل مشكل حقيقي يعرفو الناس بلا شرح.
Wow effect: فيديو ولا صورة قبل/بعد تكفي باش تبيعو.
الهامش: يغطي تكلفة المنتج، الإعلان، التوصيل والروتور، ويبقالك ربح.
التوفر: تقدر تلقاه ولا تصنّعو في الجزاير بسرعة.
التوصيل: خفيف، ما يتكسرش، وما يرجعش بزاف.
الخلاصة
أدوات Spy تشوف واش يتباع، Pinterest يجيبلك أفكار كل نهار، و Claude يرتبلك ليستة على حسب السوق تاعنا. جمع الثلاثة، وجرّب المنتج بميزانية صغيرة قبل ما تكبّر.
حب الـ prompt والطريقة كاملة؟ اكتب «SPY» في التعليقات
@karim_haned